सातारा, दि. 15 – मसाप, शाहुपुरी शाखेच्यावतीने मराठी भाषा पंधरवडा साजरा करण्यात येत आहे. त्या अंतर्गत नगरवाचनालयाच्या पाठक हॉलमध्ये पु.शि. रेगे यांच्या ‘सावित्री’ या पत्रात्मक कांदबरी आधारित ‘सावित्री’ हा एकपात्री नाटयाविष्कार अभिनेत्री प्रिया जामकर यांनी सादर केला. जवळपास दीड तास त्यांनी केलेल्या सादरीकरणामुळे सातारकर मंत्रमुग्ध झाले.

‘सावित्री’ ही पत्ररूप कादंबरी. अवघी ४९ पत्रं असलेली. आकार छोटा, पण अवकाश मोठा अशी. आईविना वाढलेल्या, तरुण बुद्धिमान मुलीच्या विचारविश्वाचा, भावभावनांचा पस मांडणारी. सुरुवातीला मुग्ध आणि नंतर परिपक्व होत जाणाऱ्या तिच्या प्रेमाचा प्रवास सांगणारी ही कादंबरी. पण तरीही ती केवळ प्रेमकथा नाही. साऊला अशा कुठल्या चौकटीत बसवताच येत नाही. कारण या बुद्धिमान, स्वतंत्र विचारांच्या, आपल्या स्वातंत्र्याचे मोल जाणणाऱ्या, पण त्यातून येऊ शकणारा बंडखोरपणा, बेबंदपणाचा लवलेशही नसणाऱ्या, अत्यंत संवेदनशील, कलासक्त, काळाच्या कितीतरी पुढे असलेल्या, वसुधवकुटुम्बकम् वृत्तीच्या आणि प्रेम या संकल्पनेला कितीतरी व्यापक रूपात पाहणाऱ्या अशा मुलीच्या जगण्याचा पटच विलक्षण आहे. तिच्याच वडिलांच्या शब्दात सांगायचं तर ती आनंदभाविनी आहे. आपल्याला मोर हवा असेल तर आपणच मोर व्हायचं, आपल्याला जे जे हवं ते आपणच व्हायचं ही तादात्म्यता तिच्यात आहे, पण असं एकरूप होतानाही आपलं मीपण हरवू न देण्याचं भानही तिच्याकडे आहे. आनंदी, खेळकर, विचारी, तीक्ष्ण विनोदबुद्धी असलेली, विचक्षण, धीट, उत्कट अशी ही तरुण मुलगी आहे.

एका प्रवासात भेटलेल्या तरुण, बुद्धिमान सुहृदाशी तिचा स्वत:हून संवाद सुरू झाला आहे. म्हणजे कोणत्या तरी ऊर्मीतून तिनेच पुढाकार घेऊन त्याला पत्रं लिहिलं आहे. त्याचंही तेवढय़ाच तत्परतेने उत्तर आलं आहे आणि दोन्ही बाजूंनी संवादाची तितकीच असोशी आहे, हे दोघांनाही मनोमन उमजलं आहे. पण ही सगळी पत्रं सावित्रीने लिहिलेली आहेत. त्यामुळे तिच्या त्याला उत्तर देणाऱ्या प्रत्येक पत्रातून त्याने त्याच्या पत्रात काय लिहिलं असेल याचा वाचक फक्त अंदाज करू शकतो. त्यामुळे तिची उत्कटता कळते तशी त्याची कळत नाही. पण सावित्रीचं मन त्याला जाणवलंय आणि त्यालाही अशाच बुद्धिमान संवादाची ओढ आहे, हे तिच्या प्रतिसादात्मक पत्रांमधून जाणवतं राहतं.

‘सावित्री’ सादर करणा-या अभिनेत्री प्रिया जामकर या पुण्याच्या एसएनडीटी महाविद्यालयात मराठीच्या विभागप्रमुख आहेत. अत्यंत बोलके डोळे, लवचिक आवाज, नृत्याची जाण असल्यामुळे लयबद्ध हालचाली, कवयित्री असल्यामुळे ‘सावित्री’मधली तरलता समजून घेण्याची क्षमता आणि अभिनयाची मुळातच असलेली आवड या सगळ्या गोष्टी त्यांना ‘सावित्री’ उत्तमरित्या साकारली. मुळात हा सगळा एका व्यक्तीने दुसऱ्या व्यक्तीशी साधलेला संवाद. तो निव्वळ नाटय़वाचन या स्वरूपात न करता एकपात्री प्रयोग या स्वरूपात सादर केला आहे. रंगमंचावर जवळजवळ दीड तास एकच व्यक्ती वावरणार असते तेव्हा सगळ्या गोष्टी त्यांच्यावरच अवलंबून असतात. त्यांचा वावर, त्यांच्या हालचाली, त्यांचा आवाज, त्यांचा अभिनय या सगळ्याच गोष्टींवर प्रेक्षकांचं लक्ष केंद्रित झालेलं असतं. या सगळ्याच बाबतीत ‘सावित्री’ अशीच असणार असं वाटावं या ताकदीने अभिनेत्री प्रिया जामकर यांनी ‘सावित्री’ सादर केली. हे सादरीकरण सुरु असताना जवळपास दीड तास पाठक हॉलमध्ये शांतता होती प्रेक्षकही त्यांच्या सादरीकरणात एकरुप होऊन गेले होते त्यामुळेच प्रयोग संपल्यानंतर दहा मिनिटे टाळयांचा कडकडाट होत राहिला.

प्रारंभी संयोजकांच्यावतीने मान्यवरांचे स्वागत करण्यात आले. सूत्रंसचालन अॅड. चंद्रकांत बेबले यांनी केले. प्रास्ताविक किशोर बेडकिहाळ यांनी तर आभार अजित साळुंखे यांनी मानले. कार्यक्रमास सातारकर रसिक मोठया संख्येने उपस्थित होते. दरम्यान मराठी भाषा पंधरवडयांचा समारोप 17 मार्च रोजी रविवारी सायंकाळी 6 वाजता नगरवाचनालयाच्या पाठक ह़ॉलमध्ये होणार असून यावेळी सातारकर रसिकांनी उपस्थित रहावे असे आवाहन संयोजकांच्यावतीने करण्यात आले आहे.