दिल्ली, दि. 26- लोकसभा निवडणुकीसाठी भाजपाने ४० स्टार प्रचारकांची यादी प्रसिद्ध केली आहे. यामध्ये पंतप्रधान नरेंद्र मोदी, भाजपाचे राष्ट्रीय अध्यक्ष अमित शाह, गृहमंत्री राजनाथ सिंह, डॉ. महेंद्र नाथ पांडे्य, उत्तर प्रदेशचे मुख्यमंत्री योगी आदित्यनाथ, उपमुख्यमंत्री केशवप्रसाद मौर्य आणि दिनेश शर्मा यांच्या नावाचा समावेश आहे. दरम्यान, पक्षाचे संस्थापक सदस्य लालकृष्ण अडवाणी, माजी केंद्रीय मंत्री मुरली मनोहर जोशी, मेनका गांधी आणि वरुण गांधी यांना या यादीत स्थान देण्यात आलेले नाही. विशेष म्हणजे अडवाणी आणि जोशी यांना यावेळी उमेदवारीही देण्यात आलेली नाही.

भाजपाने पहिल्या आणि दुसऱ्या टप्प्यातील निवडणुकांसाठी आपल्या स्टार प्रचारकांची यादी निवडणूक आयोगाला सादर केली आहे. या यादीत लोकसभा निवडणुकीचे प्रभारी जे पी नड्डा, राष्ट्रीय महामंत्री संघटन रामलाल, सुनील बन्सल, कलराज मिश्र, डॉ. लक्ष्मीकांत बाजपेयी, नितीन गडकरी, अरुण जेटली, सुषमा स्वराज, थावरचंद गेहलोत यांच्या नावाचा समावेश करण्यात आला आहे.

४० स्टार प्रचारांच्या यादीत मध्य प्रदेशचे माजी मुख्यमंत्री शिवराज सिंह चौहान, निर्मला सीतारामन, पीयूष गोयल, स्मृती इराणी, उमा भारती, मुख्तार अब्बास नक्वी, हेमामालिनी, सत्पाल महाराज, त्रिवेंद्र सिंह रावत, दुष्यंत गौतम आणि दिल्ली भाजपाचे प्रदेश अध्यक्ष मनोज तिवारी यांच्या नावाचा समावेश आहे. त्याचबरोबर संजीव बालियान, श्रीकांत शर्मा, स्वामी प्रसाद मौर्य, चेतन चौहान, धर्मसिंह सैनी, भुपेंद्र सिंह चौधरी, सुरेश राणा, अश्विनी त्यागी, रजनीकांत माहेश्वरी, अजय कुमार आणि भवानी सिंह यांचाही स्टार प्रचारकांच्या यादीत समावेश आहे.