सातारा, दि.२५- माथाडी कामगारांचे नेते नरेंद्र पाटील यांनी शिवबंधन बांधून शिवसेनेत प्रवेश केला आहे. सातारा लोकसभा मतदारसंघाची उमेदवारीही त्यांना जाहीर केली. नरेंद्र पाटील यांना सातारा लोकसभा मतदारसंघातून निवडून आणणारच असे ठाकरे यांनी ठणकावून सांगितले. दरम्यान देवेंद्रजी कृपा करुन शरद पवारांना भाजपात घेऊ नका, असा टोलाही त्यांनी यावेळी लगावला. महायुतीच्या प्रचाराचा नारळ कोल्हापूर येथे रविवार दि. 24 रोजी फोडण्यात आला. त्यावेळी जाहीर सभेत ते बोलत होते.

ठाकरे पुढे म्हणाले, मी अंबाबाईच्या विराट दर्शनाला नतमस्तक होऊन एवढंच मागेन की आम्ही जे काही करतोय ते इमाने इतबारे करतो आहे आणि तुमचं आशीर्वाद हेच आमचं भांडवल आहे आणि तुमच्या या भांडवलाला व तुमच्या विश्वासाला आयुष्यात कधी तडा जाऊ देणार नाही एवढंचं वचन मी शिवरायांच्या साक्षीने तुम्हाला देतो. आपल्या हृदयातला भगवा विधानसभा आणि लोकसभेवर फडकला पाहिजे. महाराष्ट्रामध्ये आणि भारतामध्ये शिवप्रेम रक्तामध्ये घेऊनच नवजात बालकं जन्माला येतात असं जर म्हटलं तर ते खोटं ठरणार नाही. मला खात्री आहे आपलं सरकार पुन्हा आल्यानंतर लवकरात लवकर राम मंदिर उभं राहिल्या शिवाय राहणार नाही, असेही त्यांनी सांगितले. शरद पवारांवर टीका करताना ते म्हणाले, इम्रान खान नावाचा खेळाडू पाकिस्तानचा पंतप्रधान झाला आणि आमच्याकडे शरद पवारसाहेब हे देशाचे पंतप्रधान पदाचं स्वप्न बघणारे क्रिकेट बोर्डाचे अध्यक्ष झाले. महाराष्ट्र खड्ड्यात घालण्यात ज्यांनी आयुष्य घातलं, अशी माणसं आपल्या दारात नको. राष्ट्रवादीला मत देणार असाल तर अजित पवार धरणं कशी भरणार होते ते आठवा. आम्हाला सत्ता हवी ती गोरगरिबांच्या कल्याणासाठी हवी आहे, असा टोला उद्धव ठाकरे यांनी शेवटी लगावला.