सातारा, दि. ८ – सातारचे नाक म्हणून पोवई नाका ओळखला जातो. या ठिकाणी युगपुरुष छत्रपती शिवाजी महाराज यांचा पुतळा पराक्रम आणि परंपरेची प्रेरणा सातारकरांना देत आहे. छत्रपती शिवाजी महाराज यांच्या पुतळ्याची उंची, वाढवण्यात येवून, लिंबखिंडीमधूनही या पुतळ्याचे दर्शन घडेल, असे नियोजन आहे. दरम्यान, यासाठी चौथऱ्याची उंची वाढवण्यात येईल. तसेच चौथऱ्याची उंची वाढवणे आणि पुतळा परिसराचे सुशोभिकरणाकरीता 1 कोटीचा वेगळा निधी मंजूर करण्यात आला असल्याचेही उदयनराजेंनी यावेळी सांगितले.

खा. उदयनराजे म्हणाले, 2050 सालच्या संभाव्य वाहतुकीचा ताण येवू नये म्हणून आम्ही उड्‌डाणपूल किंवा ग्रेडसेपरेटर करणार असे घोषित केले. सातारचा विकासच होवू नये अशी कुत्सित भावना असलेल्या काही विघ्नसंतोषी व्यक्‍तींनी आमच्या घोषणेला हास्यास्पद ठरवण्याचा प्रयत्न केला. तथापि सातारची ऐतिहासिक परंपरा टिकवून ठेवून जर विकास करायचा असेल तर ग्रेड सेपरेटर सारख्या मोठ्या कामांची गरज आहे. या विकास कामांमुळे भविष्यात येथील व्यापार उदिमाला वेगळेच महत्व येणार आहे. विकासाची झलक आणि जिद्द या विकासकामांच्या माध्यमातून सर्वांना पहायला मिळेल, असा विश्‍वास सातारा लोकसभा मतदार संघाचे खासदार छत्रपती उदयनराजे भोसले यांनी प्रसिध्दीपत्रकाव्दारे व्यक्‍त केले आहे.
सातारला लाभलेली शांतता आणि सर्वधर्मसमभावाची परंपरा आम्ही कसोशीने पुढे नेत आहोत.

सातारचा चेहरा मोहरा बदलण्यासाठी उड्‌डाणपूल/ग्रेडसेपरेटर, भुयारी गटर योजना, कास धरण योजना, ब्रेक टेस्ट ट्रॅक, घनकचरा व्यवस्थापन, अशा अनेक विकास प्रकल्पांची घोषणा आम्ही केली होती, त्यावेळी ग्रेडसेपरेटरच्या कामाबाबत काही विघ्नसंतोषी व्यक्‍तींनी अवहेलना केली. सातारला ग्रेडसेपरेटर किंवा उड्‌डाणपूल कशाला पाहिजे? होवू शकणार नाही, अशा पध्दतीची मते कूपमंडुक प्रवृत्तीच्या व्यक्‍तींनी कुचेष्टेने मांडली. परंतु, टिकाटिप्पणी आम्ही कधीही अंगाला लावून घेत नाही.त्यामुळे आम्ही विकास कामांवर लक्ष केंद्रीत केले. त्यानुसार अनेक

विकास कामांबरोबर ग्रेडसेपरेटरच्या कामासही मंजुरी मिळुन, सदरचे काम सुरु झाले. सुमारे 2050 सालच्या वाहतुकीची व्यवस्था आणि वाहनांची संख्या विचारात घेवून, पोवईनाका येथील आठ रस्त्यांच्या ठिकाणी कामास सुरुवात करण्यात आली आहे. 50 टक्‍के काम पूर्ण होण्याच्या मार्गावर आहे, ग्रेडसेपरेटर नंतर या भागातील व्यापार उदिमाला वेगळे वलय येवून, महत्व येणार आहे. तसेच वाहतुकीला शिस्त लागेल. वाहतुकीचा ताण वाहनधारकांसह पादचाऱ्यांना होणार नाही. काही जणांना भविष्याचा विचार करण्याची कुवत नसते, त्यांना स्वतःचा आणि फक्‍त वर्तमानाचा विचार करण्याची सवय असते, त्यांची अशी वृत्ती असली तरी ग्रेडसेपरेटरच्या कामाचे महत्व कधीच कमी होत नाही, असेही खासदार उदयनराजे भोसले यांनी व्यक्‍त केले आहे.